ЯҢАВЫЛ ТАҢНАРЫ
+13 °С
Болытлы
VK
Барлык яңалыклар
Җәмгыять
5 декабрь 2018, 15:39

Ильяс Тимершин: «Йолаларны саклаячакбыз»

Быелгы уку елы башында сәнгать мәктәбендә җитәкчелек үзгәрде – учреждение директоры итеп Ильяс Тимершин билгеләнде. Балаларны тугыз ел диярлек биредә баянда уйнарга өйрәтүче Ильяс Тимершинны бәхетле кешеләр исәбенә кертергә мөмкин – яраткан шөгыле белән туры килгән уңышлы һөнәр сайлау яшь кешегә эшкә бәйрәмгә кебек йөрү мөмкинлеге бирә. И. Тимершинның яңа вазыйфада үзен ничек тоюы турында – безнең әңгәмәдә.
– Ильяс Инзильевич, сез таныш һәм инде тупланган коллективны җитәкләдегез. Хезмәттәшләрегез сезне җитәкче сыйфатында ничек кабул итте?
– Инде күптән эшкә кадәр, балачактан, бу сәнгать йорты минем өчен үз һәм якын булды – шушы мәктәпне баян сыйныфы буенча тәмамладым. Людмила Николаевна Нагорнаяда укыдым. Биредә үз эшенә гашыйк иҗади һәм талантлы кешеләр эшли. Коллектив бик тату. Хезмәттәшләрем миңа ышанды, аларның ярдәмен һәр көн тоям. Элекке директор Рәмиз Миншәрипович зур ярдәм күрсәтә, аңа һәр сорау белән мөрәҗәгать итәм, җавап итеп аңлау һәм дусларча киңәш алам. Мәктәп өчен тырышачакмын һәм коллектив өчен көчемнән килгәнчә бар нәрсәне эшләячәкмен. Элекке җитәкчеләр еллар буе туплаган йолалар сакланыр.
– Музыкага юлыгыз ничек башланды?
– Сигезенче сыйныфтан музыка юлыннан китәчәгемне анык белә идем. Мәктәптән соң Уфа сәнгать училищесына кердем, арытаба Заһир Исмәгыйлов исемендәге Уфа дәүләт сәнгать институты булды. Диплом белән шәһәргә кайттым.
– Сезнеңчә, сәнгать мәктәбенең Яңавыл өчен әһәмияте нидә?
– Бу бит гади мәктәп түгел, ә мәктәп-йорт. Ягъни, бездә булган бөтен нәрсәне ата-аналар күреп торырга тиеш. Гадәттәгечә барлык концерт, зачет, имтиханнар вакытында өлкәннәр килсен һәм балалары өчен шатлансын өчен ишек ачык. Бала үз эшенең нәтиҗәсен күрсен өчен. Аннары, һөнәри белем бирәбез. Чыгарылыш укучыларының киләчәктә аннан куллану-кулланмавы – башка нәрсә. Ләкин бер нәрсәгә иманым камил – бала бездән тулырак кеше булып чыга. Алар барысы да талантлы. Араларында, мөгаен, ун процентлап сәләтле балалар бар. Һәм безгә аларны игътибарсыз калдырмау, аларга һөнәри юл ачу мөһим.
– Директор буларак укытучы вазыйфасында калу сезнең өчен мөһимме?
– Һичшиксез. Минем өчен укыту эшеннән башка нәрсәнең мәгънәсе юк. Преподаватель буларак үсәсе килә һәм күнекмәләрне югалтырга теләмим. Өстәвенә, балалар белән эш уңай дәрт бирә, ә бу безнең эштә бик мөһим.
– Сәнгать мәктәбендә яңалыклар көтеләме?
– Әлбәттә, вокал һәм башкорт музыка кораллары бүлекчәсе булсын иде. Моның өчен белгечләр кирәк һәм бу юнәлештә эшләячәкбез. Быел гитара сыйныфы ачтык, берсүзсез, яңа юнәлешләр һәрвакыт шатландыра.
Читайте нас: