Барлык яңалыклар
Җәмгыять
11 июнь 2019, 09:58

Сабантуйлар булсын ел да, шатлыктан тусын җырлар

Авыл хезмәтчәннәренә дан һәм хөрмәт

8 июньдә Яңавылда барысы яраткан Сабантуй узды. Сабан бәйрәме – тамашалы ат чабышы да, милли көрәш тә, капчык сугышы һәм кунакчыл милли тирмәләр дә, сәнгать осталары чыгышы, сәүдә, балалар өчен күңел ачулар да... Ә иң мөһиме – бу хезмәт кешесе, җир сөрүче, игенчене данлау. Озак көтелгән бәйрәм халәте бу көнне һәр җирдә хакимлек итте. Һава торышы да уңай туры килде – иртән үк кояш балкыды, күктә бер болыт та күренмәде. Халык чын күңелдән, шатланып һәм яхшы кәеф белән ял итте. Сабантуйның «хәмерсез» узуы яңавыллылар һәм кунакларның кәефен бөтенләй бозмады – бәйрәм чагу, күңелле һәм купшы килеп чыкты.
Шулай итеп, язгы-кыр эшләренә символик сызык үткәрелде. Буразнага төшкән ашлык бөртеге яңавыллыларга мул көзге уңыш китерер, дип ышанабыз!
Тирмәләр – бәйрәм бизәге
Барысы да яраткан Сабантуй бәйрәме быел Театр елы һәм Башкортстан Республикасының гасырлык юбилеена багышланган булды.
Бәйрәмнең тантаналы өлеше алдыннан мактаулы кунакларны икмәк-тоз, милли чәк-чәк, җыр-бию белән каршы алдылар, алар арасында БРның сәламәтлек саклау министры вазыйфасын башкаручы Максим Забелин, БР Дәүләт җыелышы – Корылтай депутаты Рәмзил Низаметдинов, күрше муниципалитетлар башлыклары, танылган якташлар бар иде.
Яңавыл Сабантуе тирә-якта, тоташ республикада да иң яхшылардан исәпләнә. Ул быел да кунакчыллык, юмартлылык, матур милли киемнәрнең чын бәйрәменә әверелде, соңрак бу хакта яңавыллылар үзләре дә, килгән кунаклар да сөйләде.
«Юлдаш» ширкәте һәм Кисәккаен авыл биләмәсе тарафыннан әзерләнгән башкорт тирмәсендә милли костюмдагы кызлар кунакларны шундук биюгә җәлеп итте. Арытаба рус (Орловка авыл биләмәсе), татар (Иске Кодаш авыл биләмәсе һәм «ИТС-Агро» ширкәте), удмурт («Победа» ширкәте һәм Шүдик авыл биләмәсе), мари («Дружба» АХПКсы һәм Первомай авыл биләмәсе) ихаталары йолалар күрсәтте, милли сый-хөрмәтләр тәкъдим итте.
Кунаклар һәм барлык теләүчеләр канәгатьлек белән милли ризыклар: мич ашлары, тәм-том һәм эчемлекләрне тәмләп карады, экспонатларны карады, Шәҗәрә өйрәнде, милли ихаталар янында фотога төште.
Тирмәләрне барлык авыл биләмәләре, кайбер предприятие һәм оешмалар урнаштырган – барлыгы 29 иде. Сүз уңае, аларның берсендә дә хәмер күренмәде.
Мәгариф, мәдәният һәм Яшьләр сарае мәйданчыклары белән күрше урнашкан сәламәтлек саклау мәйданчыгында кеше аеруча күп иде. Биредә «Сәламәтлегеңне тикшер!» акциясе узды, күчмә ФАПка керергә, диспансерлаштыру үтәргә, кан басымын үлчәтергә, ЭКГ төшәргә, буй һәм тән авырлыгын үлчәтергә, шулай ук авырулар үсеше куркынычын билгеләргә мөмкин иде.
Һәр тирмәнең үзенчәлеклелеген билгеләп үтәргә кирәк. Конкурсның жюри әгъзаларына иң яхшыларын билгеләү авыр булыр, ахры.
Кайсы хуҗалык алдынгы?
Сабантуйның тантаналы өлеше Яңавыл җирендә гомер итүче халыклар дуслыгы, эш сөючәнлек, кунакчыллыкны гәүдәләндерүче җырлы-биюле тамашадан башланды. Районның авыл хуҗалыгы алдынгылары тарафыннан Сабантуй әләмен күтәргәч, сүз район хакимияте башлыгы Илшат Вәзигатовка бирелде. Ул барлык җыелучыларны бәйрәм белән тәбрикләде, игенчеләрнең фидакарь хезмәте мул уңыш белән бүләкләнүен теләде. Сәламәтлек саклау министры вазыйфасын башкаручы Максим Забелин республика җитәкчесе Радий Хәбиров, БР Хөкүмәте исеменнән сәламләү сүзе һәм котлау белән чыгыш ясады. Ул республика үсешенә керткән өлеше өчен яңавыллыларга «Башкортстан Республикасының барлыкка килүенә 100 ел» юбилей медальләре тапшырды. Республиканың Дәүләт җыелышы депутаты Рәмзил Низаметдинов, авыл хезмәтчәннәре, барлык яңавыллыларны тәбрикләп, яхшы уңыш, җылы яңгырлар теләде.
Сабантуй – алдынгыларны бүләкләү бәйрәме. Һәм авыл хуҗалыгы хезмәтчәннәре, хуҗалыклар җитәкчеләре, баш белгечләр, бүләк алу өчен, алкышларга күмелеп сәхнәгә күтәрелде. Иң яхшы өч хуҗалык – «Победа» ширкәте», «Восток колхозы» АХПКсы, «Урада» агрофирмасы» ширкәте – югары нәтиҗәләргә ирешү һәм авыл хуҗалыгы производствосының тотрыклы үсеше өчен тиңдәшлечә 20, 15 һәм 10 мең сум күләмендә акчалата премия белән бүләкләнде.
«ИТС-Агро» ширкәтенең Иске Кодаш бүлекчәсе «Район икътисадына керткән зур инвестицион өлеше өчен» номинациядә диплом һәм 5 мең сум күләмендә премия белән бүләкләнде, «ЯнаулАгро» ширкәте – «Үсемлекчелектә фәнни технологияләрне киң куллану өчен» номинациясе һәм шул ук күләмдә премия белән.
Авыл хезмәтчәннәренә дан һәм хөрмәт
«Игътибар! Сабантуй-2019 әләме чыгарыла», – дип яңгырый тирә-якка һәр динамиктан. Быел әләм күтәрүнең мактаулы хокукына «Восток колхозы» АХПКсы механизаторы Валентин Зәеров, «Победа» ширкәте шоферы Олег Шәрәев һәм «Урада» агрофирмасы» ширкәте шоферы Рим Бәдретдинов лаек. Бәйрәм программасына ярашлы, сәламәтлек саклау министры вазыйфасын башкаручы Максим Забелин, БР Дәүләт җыелышы – Корылтай депутаты Рәмзил Низаметдинов, Яңавыл районы хакимияте башлыгы Илшат Вәзигатов һ.б. кыр һәм ферма хезмәтчәннәрен хөрмәтләде, югары бүләкләр тапшырды.
Районның авыл хуҗалыгы предприятиеләре алдынгылары колонналары үтүгә чират җитте. Урнашкан йолага ярашлы, аны шәһәрнең мәктәп укучылары башлап җибәрде, җир сөрүче, ел темасы рухында бизәлгән машиналар, заманча техника тәкъдим ителде. Алар штурвалы артында тәҗрибәле механизаторлар Сергей Васильев («ИТС-Агро» ширкәте), Илнур Шакиров («ЯнаулАгро» ), Эдуард Гайсин («Урада» агрофирмасы») һ.б. иде. Алдынгылар колоннасын «Победа» ширкәте машинасы җитәкләде, арытаба «Восток колхозы» АХПКсы, «Урада» агрофирмасы», «Агро М» ширкәтләре, «Дружба» АХПКсы вәкилләре һ.б. үтте. Колоннаны «Батыр» клубы тәрбияләнүчеләре, яшь армиячеләр, волонтерлар, үзешчән сәнгатьтә катнашучылар япты.