Басудан киштәгә кадәр

Бүген районда республика агрономнарның зона конференциясе уза. Аның гамәли өлешен «Победа» ширкәтенең Шүдик бүлекчәсендә үткәрү планлаштырылган. Бу хуҗалык очраклы сайланмаган – ул производствоның төп күрсәткечләренең байтагы буенча район АПКсының алдынгысы булып тора.

«Победа» ширкәтенең колхоз булган чагында ук әйдәүче хуҗалыклар исәбенә керүен әйтергә кирәк, ләкин ун ел элек ул бирешә башлаган иде. Авыл хуҗалыгы предприятиесенең «Кристалл» агрохолдингына кушылуы белән анда икенче тормыш башланды, соңрак ул «Победа» ширкәтенә үзгәртелде.

Бу 2010 елның сентябрендә булды. Инвестор тарафыннан беренче чиратта кредитлар каплатылды һәм залогка куелган хайваннар сатып алынды. 2011 ел ахырына предприятиедә инде 229 сыер исәпләнә иде. Тоташ ел буе алардан ул вакытта 807 центнер сөт алынган, ә хәзер агымдагы ел башыннан 600 тонна продукция җитештерелгән. Ә малларның продуктлылыгы буенча хуҗалык үткән елда район алдынгысы булды – һәр сыердан савым 6,5 тонна тәшкил итте. Бу ашатуның биредә фәнни озатылуы, барлык хайваннарның ясалма орлыкландырылуы, малларның «500 ферма» республика программасы буенча сыйфатлы яңартылуы ярдәмендә мөмкингә әверелде. Соңгы вакытта, тоташ алганда, сыер һәм бозау фермалары, ике сенаж чокыры төзелгән, фермаларга илтүче юлларга асфальт түшәлгән, 12 берәмлек төрле техника һәм җиһаз сатып алынган. Моннан тыш, 2016 елда 15 миллион сумлык ашлык киптергеч эшкә җибәрелгән, 2017 елда печән саклау өчен склад төзелгән. Игенчелектә дә җитештерү күләме югары. Шул ук вакытта мәйданнар күпкә арттырылмый – ашлама, заманча эш алымнары һәм технологияләр куллану ярдәмендә үсешкә ирешелә.

Чәчүгә орлык агуландыру өчен машина, тырмату агрегаты, «Омичка» чәчү комплексы алганнар.

Хуҗалыкның Йөгәмәш бүлекчәсендә дә байтак үзгәреш бар, бирегә холдинг 2014 елда «Маяк» АХПКсы урынына килде. Менә берничә сан: 2013 елда тоташ елга һәр сыердан савым 1705 тонна тәшкил иткән, быел исә елның беренче айларында гына 1600 тонна савып алынган. Һәм холдингның чимал гына түгел, ә куллануга инде әзер азык-төлек җитештерүен әйтергә кирәк – 2011 елдан Яңавылда «Победа» ширкәтенең сөт заводы ачылды. Сменага 30 тонна сөт эшкәртергә мөмкинлек бирүче проект куәте буенча биредә 5-10 тоннадан башлаганнар, хәзер тулы куәткә эшлиләр. Үткән елда 3,5 тонна диярлек пастеризацияләнгән сөт, 126 тонна атланмай, 500 тоннадан артык эремчек, 240 т куе сөт, 10 т сыр җитештерелгән. Бүген «Яңавыл сөте» бренды район чикләреннән еракта билгеле.