Кукуруз – ул хәзинә, җыеп алырга өлгер генә

Кукуруз ФАОсы нәрсә ул? «Stay green» нәрсәне аңлата һәм «Родригес» белән «Роналдиньо»ның авыл хуҗалыгына нинди мөнәсәбәте бар? «Победа» ширкәтенең Шүдик бүлекчәсендә үткән укыту семинар-киңәшмәсендә бу һәм башка гаять кызыклы сорауларга җавап алырга мөмкин булды. Чара тәҗрибә басуында үтте, биредә кукуруз орлыгы белән тәэмин итүче алты төрле фирма быел яз бу культураның 43 гибридын чәчкән.

Районның авыл хуҗалыгы предприятиеләре агрономнары һәм җитәкчеләре, авыл хуҗалыгы идарәсе белгечләре, район җитәкчелеге һәм, әлбәттә, галимнәр, тәэминатчы фирмалар белгечләре безнең шартларда аларның кайсы иң яхшы нәтиҗә күрсәтүе белән танышу өчен җыелды.

Тәэминатчылар танып-белү һәм кызыклы лекцияләр белән чыгыш ясады, сорауларга җавап бирде. Алар күп булды, чөнки кукуруз – сөтне иң күп төшерүче культура, ул маллар рационында бик кыйммәтле культура. Мәсәлән, аны туфракны минималь эшкәртү технологиясе буенча чәчү мәгънәсез диярлек, зарури рәвештә сөрелгән, йомшак җир кирәк, чөнки үсемлек тамыры белән сулыш ала.

Рәт арасын эшкәртү, азотлы ашламалар белән икеләтә тукландыру кирәк, ә силоска салганда үсемлекне хәтта кисү биеклеге мәгънәгә ия, кукурузның ремонтантлыгын исәпкә алу кирәк – «stay green» – өлгерешнең төрле фазасында үсемлекнең яшел өлешен саклау сәләте. Шуңа күрә чәчкәндә беренче чиратта ФАО – кукурузның иртә өлгерүчәнлек индексына игътибар итү кирәк. Семинарда катнашучылар бер төрле ФАОлы гибридларның өлгерешнең әлегә сөт фазасына гына җитүенә үз күзе белән күреп инанды, башкаларның исә инде балавызсыман һәм хәтта тулы өлгереш, берәүләре кыска буйлы, ә, мәсәлән, «Родригес» һәм «Роналдиньо» кебек сортларның ике метр биеклеккә җитүе күзәтелә, ә технологиясен бозып чәчелгән орлык бөтенләй начар нәтиҗә күрсәтә.

Гомумән, кукуруз игү – ул тоташ фән, биредә бөтен нәрсәдә баланс булырга тиеш, аңа ирешү җиңел түгел. Бәлки, шуңа күрә аны игүгә бөтенесе тотынмый. Авыл хуҗалыгы идарәсе белгечләре тарафыннан билгеләнүенчә, быел безнең районда кукуруз булган мәйданнарның 1300 гектарын били. Ул нигездә «Победа», «Урада» агрофирмасы», «Агро М» ширкәтләре, «Восток колхозы», «Дружба» АХПКларында игелә, күп булмаган күләмдә шулай ук «Марс» авыл предприятиесе ширкәте һәм «Мирас» АХПКсында чәчәләр.