Чабалар, җыялар, тыгызлыйлар...

Район игенчеләре әле кичә генә тир түгеп булачак уңышка нигез салу белән мәшгуль кебек тоела иде, инде Сабантуйлар гөрләп үтте, һәм аграрийлар азык хәзерли.

Авыл хуҗалыгы идарәсе мәгълүматларына ярашлы, атна башына районның авыл хуҗалыгы предприятиеләре тарафыннан 2245 гектар мәйданда үлән чабылган. 11651 тонна планнан 702 тонна печән һәм 3412 тонна сенаж хәзерләнгән (план 34498 тонна тәшкил итә).

«Восток колхозы» АХПКсы, «Агро М», «Урада» агрофирмасы» ширкәтләре, «Марс» авыл предприятиесе, «Дружба» АХПКсы хезмәтчәннәре аеруча зур өлеш кертә.

Ахыргы хуҗалыкта азык хәзерләүдә берьюлы ун берәмлек төрле техника мәшгуль, ләкин аларның сафы тиздән тулыланачак, чөнки биредә әлегә печән генә хәзерлиләр. Шулай да үткән атна ахырында, без «Дружба» авыл хуҗалыгы кооперативына барганда, басулар кырмыска оясын хәтерләтә иде. Кайбер тракторлар чаба, башкалары тырма-әйләндергеч ярдәмендә инде кипкән печәнне тезмәләргә җыя, өченчеләре рулонга тыгызлый, чыгара, өя...

– Бездә инде ике атна диярлек шундый күренеш күзәтелә, – дип уртаклашты безгә авыл хуҗалыгы предприятиесенең баш агрономы Вячеслав Демидов, – һава торышы мөмкинлек биргәндә, эшне тәмамларга ашыгабыз.

Хуҗалык фермасында җанлылык хакимлек итә. Зур ремонт эшләренең биредә алдагы берничә елда башкарылуын билгеләргә кирәк, быелга бурыч – сенаж траншеясен төзү.

Хәзер исә фермада ремонт белән мәшгуль слесарь һәм эретеп-ябыштыручылар, шулай ук сөт блокларын «төзекләндерүчеләрне» очратырга мөмкин – идән кою, дивар һәм түшәмнәрне «эстетик» материал белән тышлау бара.

– Беренче чираттагы максат – һәр сыердан савымны 5000 кг.га кадәр җиткерүгә үткән елда ирешелде, хәзер хезмәт шартларын яхшырту турында да уйларга вакыт, – ди ферма мөдире Павел Савкин.