Рәхмәт сиңа, «Артек»

Беренче тапкыр самолетта очтым, лагерьга бардым һәм өстәвенә «Артек»ка эләктем. Минем смена «Туган көнең белән, Артек!» дип аталды. Аңа быел 93 яшь тулды. Һәм Кырымның Русия белән кушылуыннан соң «Артек»ның бишенче туган көне. Минем өчен бу кинәт чынга ашкан иң зур хыял. «Янтарный» лагереның унынчы профильле КВН отрядында булдым.

6 июньдә алтынчы смена ачылды. Безгә чаралар күп көтелә диделәр: Балалар «Новая волна», Балалар «Евровидение»се...

Севастопольнең истәлекле урыннарында экскурсиядә булдык. Герой шәһәргә бару бәхетенә ирешүемә бик шатмын. Аның турында ишеткән генә бар иде, ә хәзер аларны үзем күрдем. Биредә тарихи һәйкәлләр бик күп – ике меңгә якын, байтагы Кырым һәм Икенче дөнья сугышы белән бәйле. Кырымның шушы шәһәрендә «ЮНЕСКО»га дөнья мәдәниятенең аеруча әһәмиятле йөз һәйкәле исәбенә кертелгән «Херсонес Таврический» милли тыюлыгы урнашкан. Биредә борынгы собор һәм монастырьлар бар, Владимир соборы – князь Владимир качману кабул иткән урын иң танылганы булып тора...

7 июньдә 200әр яшьлек, мамонт кадәр зурлыктагы «яшь агачлар» үскән «Никитский сад»та йөрдек; нәзакатьле, чагу розалар, ак төнбоеклар, бамбуклар аллеясенә хозурландык.

8 июньдә Кырымның көньяк ярында булдык. Ливадия һәм Массандра дворецларына бардык. Соңгысында император Александр III яшәгән. Биредә истәлекле урыннар шулкадәр күп! Барып җиткәч тәү тапкыр аксыл-зәңгәр диңгез буена төштек. Су коенгач ирендә тоз тәме калды.

Ә кич концлагерьларда һәлак булганнар истәлегенә гыйбадәт кылу үтте. Арытаба өлкән отрядларга «Список Шиндлера» фильмы тәкъдим ителде (С. Спилбергның Икенче дөнья сугышында меңнән артык еврейны коткарган Оскар Шиндлерның тарихы турында кинокартина – ред.).

9 июнь бик кызыклы һәм эчтәлекле үтте. Көннең беренче яртысында диңгезгә бардык, арытаба дөнья халыклары дуслыгына багышланган линейка узды. Көндезге ялдан соң челтәрле белем бирү модулендә булдык. Кодлаштыру, викторина, документаль фильм карау һәм картиналар күргәзмәсе барысына да ошады! Кичке аштан соң безнең отряд Морской лагерена юнәлде, анда концерт үтте: Русия һәм чит илнең төрле шәһәрләреннән бию коллективлары чыгыш ясады.

11 июнь. Иртән үк балалар төрле эш белән мәшгуль булды: кемнәрдер «Артек-Инсайт»ка барды, анда икенче урын алды. Бу «Нәрсә? Кайда? Кайчан?» билгеле уен прототипы. Биредә җиңү өчен куелган сорауга җавап белү зарури түгел, аны сорауда яшеренгән күрсәтеп бирүләрне кулланып, таба белергә кирәк.

Мин катнаш туристик маршрутны сайладым, биредә һәркем үзен турист ролендә сынап карый ала.

12 июнь. «Хрустальный» отряды белән уртак биюгә репетиция ясадык, авыр, ләкин нык кызыклы. Профиль дәресендә шулай ук КВН-«разминка» уйнадык! Безнең отряд чын КВН командасына әверелә! Арытаба бассейнга бардык, анда дуслар белән вакытны күңелле үткәрдек.

Соңрак арысланнар паркы «Тайган»га киттек. Анда арысланнар гына түгел, ә тәвә кошлары, жираф һәм кыр тавыклары бар.

13 июньдә «Викинг» кинопаркына бардык, анда Русияне чукындыручы – бөек князь Владимирның тормышы турында бәян итүче тарихи фильмнан викингларның урта гасырлар биләмәсенең үзенчәлекле декорацияләре урнаштырылган. Биредә күп яңа нәрсә белдек. Тарихи экскурсиядә булдык, яугирләрнең театрлаштырылган тамашасын күрдек, анда уктан ату, пычак ыргыту, аркан тартышу һ.б. күңел ачулар оештырылды. Һәм боларның барысы күркәм Кызыл мәгарәләр үзәнлегендә! Арытаба квест үттек. Безнең команда икенче урын яулады.

14 июньдә Артек-аренада «Янтарный» һәм «Хрустальный» лагеренда финал эше – бию «баттлы» узды. Танылган җырчы Доминик Джокер һәм «Голос» тапшыруында катнашучы Екатерина Кокоринаның чыгышы чараның ахыргы аккордына әверелде.

15 июньдә Спорт сараена юнәлдек. Биредә «Т-34» танкы турында фильм карадык. Кинокартина барыбызга да бик ошады. Кунаклар белән батырлык, патриотлык темаларын тикшердек. Фильмның төп фикере, минемчә, кеше нинди хәлдә дә төшенкелеккә бирелергә тиеш түгел.

Кич «Артек»та 38нче медиа-көрәш үтте. Абсолют җиңүче һәм лагерьның төп кубогына ия булучы ачыкланды.

Лагерьның учак зонасында «Безнең Геройлар» бөтенрусия акциясенә йомгак ясау тантанасы үтте.

Дәүләт Думасының мәгариф һәм фәннәр буенча комитеты рәисенең беренче урынбасары, «Бергә эшлик!» хәрәкәтенең координацияләү советы рәисе Геннадий Онищенко Артекка акциядә катнашучыларны котларга килде.

16 июнь иртән Артекның туган көненә багышланган линейка үтте. Арытаба Хәзинәләр ярминкәсенә киттек, анда спорт ярышларында катнаштык. Катерда йөрү бүләкләрдән берсе булды. Бу тасвирлап бетерә алмаслык хисләр!

Ә инде кич смена ябылуга багышланган чара узды, анда безгә диплом һәм учактан күмерләр – бу урын турында җылы хатирәләр тапшырдылар. Малайлар йоланы дәвам итте һәм кызларга чәчәкләр бүләк итте, трибуналар буенча розаларның тоташ диңгезе «җәелде».

Балалар тәҗрибәле шеф-пешекчеләр җитәкчелегендә үзләре пешергән зур торт бәйрәмнең тагын бер үзенчәлегенә әверелде. Аны «Артек-Арена»ның нәкъ үзәгенә чыгардылар. Җиңел булмаган, ләкин мактаулы эш – барлык 93 шәм шундук өреп сүндерелде.

Дәүләт Думасының спорт, туризм һәм яшьләр эшләре буенча комитеты рәисе Михаил Дегтярев бәйрәмнең мактаулы кунагы иде.

Халыкара балалар лагерена парламентарий Комитеттан бүләк – чын шар белән килгән. Димәк, «Артек»та ял итүчеләрнең тагын бер хыялы – һавада йөзүне тормышка ашыра алачак.

21нче көн бик тиз үтте. Нәкъ биредә, «Артек»та, вакытның һәр минутын бәһаларга өйрәндем. Бу иң яхшы смена булды. Рәхмәт сиңа, «Артек!». Онытылмас смена өчен рәхмәт. Без биредә танышкан һәм якын дуска әверелгән балаларга рәхмәт. Бирегә янә килергә телим!

Шулай ук, куратор Людмила Викторовна Хәйбулинага мин бик рәхмәтле. Бөтен балаларның шундый конкурсларда катнашуын телим. Бәлки, сезгә дә, миңа кебек, уңай туры килер.