Йолаларны хөрмәтләү билгесенә

Быелгы ел Башкортстан өчен үзгә әһәмиятле – 1919 елда тәү тапкыр дәүләт дәрәҗәсендә автономияле республика барлыкка килгән. Мәдәният идарәсе мәгълүматлары буенча, 5 апрельдә республиканың 100 еллыгына багышланган гаять зур чара үткәрү планлаштырыла. Бүген мәдәният учреждениеләрендә аңа әзерлек бара. Шул арада сәнгать мәктәбендә инде рәсемнәр күргәзмәсе белән танышырга мөмкин. Ә район үзәк китапханәсендә республиканың 100 еллыгына багышланган «Мой край родной – Башкортостан» күргәзмәсе эшли. Ул Башкортстанның тарихына, шулай ук казанышларына багышланган. Биредә Әхмәт-Зәки Вәлидинең тарихи хезмәтләрен, шулай ук замана тарихчыларын, Хәлим Әмиров, Хафиз Уранский һ.б. кебек танылган якташлар турында материаллар да күрергә мөмкин. Биредә шулай ук тарихи фотолар да үз урынын тапкан.

Мәктәп һәм балалар бакчаларында сыйныф сәгатьләре, викториналар, рәсемнәр, сәнгатьле шигырь укучылар конкурслары, конференцияләр, Шәҗәрә бәйрәмнәре һ.б. үткәрелә. 1 санлы мәктәптә һәм 8 санлы «Канәфер чәчәк» балалар бакчасында узган. Чара турында җентеклерәк сөйләп үтәбез.

Фамилия – буыннар горурлыгы

13 мартта 1 санлы мәктәптә «Шәҗәрә бәйрәме» узды, аны башкорт теле һәм әдәбияты укытучысы Әлфия Фәршатова әзерләгән. Бәйрәмгә башкортларның район Корылтае башкарма комитеты рәисе Рафаил Яхин һәм Башкорт хатын-кызлар җәмгыяте җитәкчесе Гөлнара Вәлиева чакырылган иде. Бишенче сыйныф укучысы Раил Гәрәев шәҗәрәсе белән таныштырды. Аның тамырлары Сандугач авылында башлана. Бәйрәмнең икенче өлешендә мәктәп укучылары чын-чыннан фольклор бәйрәме күрсәтте.

Без, ата-аналар, шундый чаралар үсеп килүче буынга кирәк һәм мөһим, дип уйлыйбыз. Туганнар мөнәсәбәтеннән башка һәр гаилә – агачыннан өзеп алган ботак сыман. Һәм гаилә тарихын, фольклорны өйрәнү буының, халкыңныкы булуың, туган тел өчен горурлык хисен тәрбияләргә ярдәм итә.

Индира Гәрәева.

Курай елмайсын өчен

8 санлы «Канәфер чәчәк» балалар бакчасында тәрбияләнүчеләр үткән пәнҗешәмбе милли костюм кигән – монда Шәҗәрә бәйрәме узды. Балалар кунаклар һәм ата-аналар өчен рус, татар, башкорт, удмурт телендә шигырь һәм җырлар тәкъдим итте. Кызлар башкорт һәм татар халык биюен («Җиде кыз») башкарды.

Бәйрәм әкият персонажларыннан башка булмады: балаларга Курай исемле күңелсез чәчәк тоткан Айсылу исемле башкорт гүзәле килде. Курайның кәефен күтәрү өчен балалар Башкортстан символы турында барлык белгәннәрен сөйләде. Балаларның мондый тирән белеме билгеләнмичә калмады һәм Курай янә елмайды һәм алар белән уен уйнады.

Гаиләләрнең нәселе турында кызыклы хикәяләре бәйрәмнең иң югары ноктасына әверелде. Әминә Шәрәпова әтисе белән нәсел агачыннан Ватан иминлегенә хезмәт иткән һәм якташларының хөрмәтен яулаган өлкән буын хакында сөйләде. Фәрраховлар гаиләсе тамашачыларга XIX гасыр башыннан ата-бабалары турында гына сөйләп калмады, ә алар белән бергә тату гаилә турында җыр да башкарды. Өченче катнашучы гаилә – Әхмәтшиннар – гаилә истәлекле әйберен – удмурт хатын-кызлары ягыннан буыннан-буынга тапшырылган күкрәккә тагыла торган «көмеш» бизәнгеч һәм балдак күрсәтте.

Шәҗәрә бәйрәмендә районның милли җәмәгатьчелек оешмалары җитәкчеләре: Маргарита Зарипова, Юрис Сәетов, Рафаил Яхин килгән иде. Соңгысы чара ахырында бәйрәмне искиткеч оештырган балалар бакчасы коллективына, ата-аналарга рәхмәт белдерде, шулай ук балалар киләчәктә туган телен саклар, дигән ышаныч белдерде.

Олеся Тукташева.