Эткенә авылында яшәүче герой-ана Рәсимә Хаҗиева 90 яшен билгеләде

Лидия Гарипова

Эткенә авылында яшәүче Рәсимә Хаҗиева 20 мартта күркәм юбилеен билгеләгән. Тыл хезмәтчәне, ун бала тәрбияләп үстергән, шулай ук кыз туганының баласын балигъ булганчы караган күпбалалы анага 90 яшь. Рәсимә Хаҗи кызын тормышында әһәмиятле вакыйга белән тәбрикләү өчен, рәсми берәмлекләр – ветераннарның район советы рәисе Рима Фазылова һәм Эткенә авыл биләмәсе башлыгы Әлфрит Минязов та килгән. Күпьеллык хезмәт һәм ун баланы лаеклы тәрбияләү өчен рәхмәт сүзләре белән Рима Фәми кызы ил президенты Владимир Путин, республика башлыгы Радий Хәбиров, Яңавыл районы хакимияте башлыгы Илшат Вәзигатов, шулай ук ветераннарның район советыннан котлау открыткалары һәм бүләкләр тапшырды. "Сезнең буын – тыл хезмәтчәннәре – өлешенә байтак сынаулар төште, әмма барлык авырлыкларын лаеклы һәм намус белән үттегез, – диде ул юбилярны тәбрикләп. – Бөтен нәрсә өчен рәхмәт сезгә, сәламәт булыгыз һәм, балалар, оныкларыгыз сөюе һәм хәстәрлеген тоеп, тагын озак еллар яшәгез".

– Миңа игътибар күрсәтү өчен рәхмәт белдерәм, Ходай барыгызга да ныклы сәламәтлек бирсен, – диде җавап итеп озын гомер кичерүче.

Рәсимә Хаҗиева – авылның төп кешесе. Унтугыз яшендә авылдашы Әдһәмгә кияүгә чыккан. Никахлары озак дәвам иткән, бриллиант туйга берничә ай гына калганда ишле гаилә башлыгы бакыйлыкка күчкән. Гомер юуе икесе дә Куйбышев исемендәге колхозда эшләгән. Өлкән яшьтә булуына карамастан, Рәсимә Хаҗи кызы оптимизм һәм тормыш дәрте белән тулы. Йорт буенча мәш килә, йола буенча җомга көнне шәңгә, пирог пешерә, үзе мунча яга. Ә балалары, оныклары хуҗалык буенча, бакчада ярдәм итә. Әйткәндәй, Хаҗиевларның биш баласы туган авылын яшәү урыны итеп сайлаган, алар көн саен әнисе янына килеп йөри. Ә быелгы кебек мөһим вакыйгалар буенча ата-ана йортында берничә буын җыела. Гаилә киңлеккә дә, буйга да зурайган: бүген Рәсимә Хаҗи кызының уллары һәм кызлары гына түгел, ә 24 оныгы, 38 туруны һәм 2 оныгының оныгы бар.