"Шулкадәр арыйм, социаль челтәрләрдә утырырга көч тә калмый"

Бүген сезне Аяз Зыязов белән таныштырырга телибез. Аңа 14 яшь. 1-6нчы сыйныфларда Аяз Яңавыл лицеенда укыган, ә җиденче сыйныфтан Республика инженерлык лицей-интернаты (РИЛИ) укучысы. Яңавылда "5"ле билгеләренә генә укыган, Уфада да триместрларны "4"лесез тәмамлый.

– Аяз, ничек инженерлык лицеена керергә карар иттең?

– Алтынчы сыйныфта сыйныф җитәкчесе Александр Михайлович (Бронников – авт.) миңа "Орбита" олимпиадасында катнашырга тәкъдим итте. 30 майда әнигә мине РИЛИ нигезендәге яраклашу лагерына чакырулары хакында хәбәр килде. Тәүдә баш тарттым, чөнки каникулда укырга теләмәдем. Әмма бераз уйлагач, үземне сынарга карар иттем. 31 майда әлеге лицейның тулай торагына урнаштым. Өч көн дәвамында алтынчы сыйныф темаларын кабатладык һәм җиденче сыйныфка да кагылдык. Яраклашу лагеры ахырында безне керү имтиханы көтә иде. Ул түбәндәге предметларны үз эченә ала: математика, рус теле, физика һәм инглиз теле. Аларны "5"легә тапшырдым. Рәсми сайтта 2019-2020 уку елына исәпкә кертүгә киңәш ителгән исемлекләр куелды, биредә мин дә бар идем.

– Көнең ничек үтә?

– Ул тулы, минутлап диярлек төзелгән. Мәктәптә 13.40 сәгатькә кадәр укыйбыз, арытаба төшке ашка барабыз. Арытаба киемне алыштырабыз, ял итәбез һәм төрле предметлар буенча өстәмә дәресләргә барабыз. Гадәттә сәгать ярым шөгыльләнәбез. Дәрестән тыш шөгыльләнүдән соң баскетбол буенча тренировкаларга йөрим, алар безнең гадәттә 19.00 сәгатькә кадәр. Уеннан соң арып ашханәгә кичке ашка барам, арытаба – интернат корпусына. Бераз ял иткәннән соң өй эшләрен әзерлим. 22.00 сәгатьтә йокларга ятабыз, һәм аңа кадәр вакытны файдалы үткәрергә тырышам. Китап укырга, үткән материалны кабатларга, ниндидер яңа нәрсәләр өйрәнергә. Көн ахырына шулкадәр нык арыйм, хәтта кулга телефон алып, социаль челтәрләрдә утырырга да көч калмый.

– Бераз үзең турында сөйлә әле.

– Мин бик аралашучан, минем белән төрле темага сөйләшергә мөмкин. Пычрак әйберләр һәм тәртипсезлек яратмыйм, тәрбиячеләр безнең бүлмәнең иң чистасы булуын билгели. Холкым буенча бик изге күңелле, беркайчан да диярлек кешегә ачу сакламыйм. Тагын мин тугры дус, миңа һәрчак таянырга мөмкин, теләсә кайсы минутта ярдәм килергә әзер.

– Һәм соңгы сорау. РИЛИда уку сиңа нәрсә бирә?

– Лицей анык фәннәр һ.б. өлкәләрдә белемеңне күрсәтү өчен күп мөмкинекләр бирә. Җиденче сыйныф ахырында химия кызыксындыра башлады, һәм үзаллы рәвештә аның белән шөгыльләнә башладым. Быел өстәмә дәресләргә йөрим. Безне олимпиада мәсьәләләрен чишәргә өйрәттеләр. Минем бөтен нәрсә килеп чыкты. Бер атна эчендә диярлек сигезенче сыйныфның яртысыннан күбесен үттек. Химия буенча төрле олимпиадаларга теркәлү башланды. Нәтиҗәдә өч олимпиадада беренче һәм икенче этапларда җиңүче булдым, остазларым ярдәмендә арытаба алга китә алдым.

Элекке сыйныф җитәкчеләре Гөлнур Риф кызы Батырова, Александр Михайлович Бронников һәм, әлбәттә инде, әти-әнигә бик рәхмәтлемен.