Гүзәллек дөньясында

Сәнгать илһам чыганагы һәм тормышта юл күрсәтүче булып торган байтак яңавыллылар белем алган Балалар сәнгать мәктәбе узган җомга «алтын» юбилеен билгеләде.

Бу уңайдан тантанага республика башкаласыннан югары берәмлекләр, күрше районнардан хезмәттәшләре, ветераннар һәм данлыклы чыгарылыш укучылары саныннан мактаулы кунаклар, район хакимияте вәкилләре килде һәм, әлбәттә инде, педагоглар, укучылар һәм аларның ата-аналары җыелды. Һәммәсе мәктәп адресына җылы һәм ихлас теләкләр белдерде, коллективның эше турында рәхмәт белән сөйләде.

Укучылар һәм преподавательләр кунаклар өчен зур концерт әзерләгән. Конкурс дипломантлары һәм лауреатлар чыгыш ясады һәм һәрберсе, халәтнең тантаналылыгын тоеп, үзен тулысынча күрсәтергә тырышты. Ә тамашачылар бу көнне алкышларын кызганмады.

– Сәнгать мәктәбе лаеклы рәвештә район мәдәниятенең төп учакларының берсенә әверелде, – дип билгеләде чыгышында район хакимияте башлыгы Илшат Вәзигатов. – Биредә үз йолалары һәм буыннарның күчә-килүчәнлеге белән бердәм иҗади коллектив эшли.

Республика укыту-методика үзәге директоры Лариса Марешова БРның мәдәният министры Әминә Шәфыйкованың сәламләү адресын укып ишеттерде. Ул мәктәп ветераннарына ведомствоның рәхмәт хатларын тапшырды. Учреждениенең байтак педагоглары район дәрәҗәсендәге бүләкләр белән билгеләнде.

Мәдәният идарәсе башлыгы Ринат Ибраһимов, Уфа сәнгать училищесының халык музыка уен кораллары бүлеге мөдире Айрат Бариев һәм аның хатыны, Яңавыл музыка мәктәбен тәмамлаучы Чулпан Мидхәт кызы, шулай ук Нефтекама шәһәре һәм Югары Тәтешле авылының сәнгать мәктәбе вәкилләре хезмәттәшләрен юбилей белән тәбрикләде. Юбиляр мәктәп директоры Рәмиз Солтанәхмәтовның чыгышы коллективка карата җылылык һәм рәхмәт белән сугарылган булды. Балалар сәнгать мәктәбенең элекке җитәкчеләре Альбина Миңнеәхмәтова һәм Фидәил Мөхәммәтҗанов сәхнәгә зур дулкынлану хисе белән күтәрелде. Эшләү елларын искә алып, ветераннар ару-талуны белмәс хезмәте белән балада югары сәнгатькә карата сөю тәрбияләгән, ләкин инде безнең арада булмаганнарның исемнәрен залда утыручылар хәтеренә төшерде. Сәнгать мәктәбен тәмамлаучылардан байтак җылы сүзләр яңгырады. Кунаклар бүләкләр тапшырды һәм коллективка мәктәп тормышының алдагы этабы шундый ук кызыклы, эчтәлекле, иҗади һәм чагу булуын теләде.

Илшат Вәзигатов, район хакимияте башлыгы:

– Яшь талантларны чыныктыру урыны исемнәре Яңавыл җиренең горурлыгына әвереләчәк тагын күп балалар тәрбияләвен телим. Кабатланмас хезмәт өчен коллективка рәхмәт белдерәм. Мәктәптә күбрәк сәләтле балалар һәм мавыгучан преподавательләр булсын.

Лариса Марешова, БРның Республика укыту-методика үзәге директоры:

– Бүген мәктәп актив үсештә, барлык белгечләре, педагоглары – югары һөнәрманлыклы иҗади шәхесләр. Республика, төбәк һәм халыкара конкурсларда җиңүләр моңа дәлил. Коллективның нигезе, преподавательләр составының яртысыннан күбесенең чыгарылыш укучыларыннан торуын билгеләргә кирәк.