Барлык яңалыклар
Мәдәният һәм сәнгать
28 гыйнвар 2019, 15:32

«Исәнме, театр!»

Яңавылда исемле елда нинди чаралар планлаштырылган

Тагын бер тематик ел башланды – Русия Президенты Владимир Путин карары белән ул Театр елы дип игълан ителде. Исемле елда безне нәрсә көтүе турында район мәдәният идарәсе башлыгы Ринат Ибраһимов сөйли.
– Соңгы исемле ел темалары күбесенчә мәдәният өлкәсенә кагылды: 2014 елны без уртак мәдәният билгесе астында үткәрдек, 2015 ел Әдәбият елы булды, 2016 ел – Русия киносы елы һәм менә ике елдан соң ил дәрәҗәсендә театр темасы расланды. Нигә өстенлек нәкъ шул юнәлешкә бирелде? Чөнки театр Русиянең горурлыгы булды, бар һәм булачак. Ләкин соңгы елларда аңа ярдәм кирәк, шул исәптән матди планда да.
Безгә турыдан-туры нәрсә кагылачак – периферияле театрларның заманчалаштырылуы көтелә һәм быелгы ел театр студияләренең «ремонт» эпопеясенең башлангыч ноктасына әвереләчәк. Быел үзенең 60нчы юбилеен билгеләячәк «Хәят» татар халык театры өчен 2019 ел күп уңай яңалыклар алып килер, дип ышанабыз. Юбилейлы даталар сәбәпле, «Хәят» тамашачыларга беррәттән берничә премьера күрсәтәчәк. Бу Н. Гаетбайның «Аты барның дәрте бар» куелышы, К. Тинчуринның «Сүнгән йолдызлар» драмасы, шулай ук тамашачыларның күпсанлы үтенече буенча Д. Бүләковның «Изге гамәл» трагикомедиясен карый алачакбыз. «Хәят»нең күрше районнарга гастрольләре көтелә. Шулай ук «Дебют» үрнәкле балалар театры ел дәвамында яңа куелышлары белән балалар бакчасында тәрбияләнүчеләр алдында чыгыш ясаячак. Мәдәният идарәсе тарафыннан Театр елын үткәрү буенча чаралар планы төзелде. Исемле ел предприятие, учреждение коллективларын да урап узмаячак – тиздән иң яхшы театр куелышына «Алтын битлек» иҗади конкурсы игълан ителәчәк, аның йомгаклары Елны япканда яңгыраячак.
Барыннан да тыш, иҗади коллективларны яшәртү буенча яшь белгечләрне җәлеп итүдә зур эш башланды. Моннан башка, 14-15 майда районда гаять зур «Моңга бай гармун бәйрәме» республика гармун бәйрәмен үткәрү көтелә. Безнең иҗади коллективлар Екатеринбургта «Сабантуй» милли бәйрәменә барачак. Уфада, 31 октябрьдә үтәчәк «Башкортстан тарихы битләре» республика фестиваль-марафонында катнашачакбыз. Башкортстанның 100 еллыгына һәм халык шагыйре Мостай Кәримнең гасырлык юбилеена багышланган гаять зур чараларда безнең коллективларның актив катнашуы көтелә.