Барлык яңалыклар

Яңавылда беренче театр премьерасы-2021 узды

"Хәят" татар халык театры актерлары яңа спектакль белән чыгыш ясады

Менә инде алты дистә елдан артык "Хәят" урындагы татар театры "халык" горур исемен йөртә. Алардан яртысын – 28 ел – коллектив белән Башкортстанның атказанган мәдәният хезмәткәре Салават Хәмзин җитәкчелек итә. Шул еллар эчендә коллектив зур иҗади юл үтте, байтак спектакльләр куйды, исткиткеч талантлы үзешчән актерлар туплады. "Хәят" күп тапкыр республика, төбәкара һәм хәтта Русия фестиваль һәм смотрларында җиңүче, призерга әверелде. Тамашачы Яңавыл театрын ярата һәм һәр премьерасын түземсезлек белән көтә. Һәм спектакльгә килеп, аларны басып алкышлый.
24 мартта да шулай булды: театр сәнгате һәвәскәрләре МКДЦга яңа спектакльнең озак көтелгән премьерасына җыелды. Озак көтелгән, чөнки билгеле сәбәпләр белән бәйле, үткән елда мәдәни чаралар онлайн форматта гына үтте һәм, коллектив Бөек Җиңүне 75 еллыгына премьера әзерләүгә карамастан, ул куелмыйча калды.
Тамашачылар игътибарына Туфан Миңнуллинның шундый ук исемле әсәре буенча "Нәзер" трагиокомедиясе тәкъдим ителде.
...Авылда беренче егет, гармунчы Хисмәтулла һәм кыю, шаян Маһирә. Икесе дә тыйнак Хикмәтулла һәм Заһирә. Ике дус һәм ике ахирәт бер көнне туй үткәрергә карар итә. Әмма сугыш башлана... Яу кырында үлем куркынычы астында ике дус нәзер әйтергә карар итә – әгәр икесе дә исән әйләнеп кайта алса, бер атнага хатыны белән алышачаклар. Ә тагын берсе вафат булу очрагында дусты гаиләсенә терәк һәм ярдәм булырга ант итәләр.
Нәтиҗәдә икесе дә әйләнеп кайта. Тугры дуслар яу кырында биргән ант сүзләрен оныта.
Еллар үтә... Каты авырып, Хисмәтулла урын-җиргә ята, Хикмәтулла да "яшел елан" колына әверелә. Менә хатыннары ирләренең нәзерен исенә төшерә һәм бөтен нәрсәне төзәтергә карар итә...
Театр актерлары – Бөтенсоюз смотр лауреаты Филүс Абзалов (автор), "Идел йорт" төбәкара фестивале дипломанты Ришат Кильметов (Хикмәтулла), Айнур Мөхәммәтов (Хисмәтулла), Дамира Хаҗиева (Маһирә), Бөтенсоюз смотр лауреаты Мәүлиха Хәмзина (Заһирә) – һәрвакыттагыча, ролен бик чагу башкарды, тамашачыларга геройларның барлык хис-кичерешләрен җиткерә алды. Яңавыл тамашачысы геройлар белән бергә елады да, көлде дә, күп нәрсә хакында уйланды да...
Спектакльне театр режиссеры Салават Хәмзин, театр һәм киноның яшь актеры, якташыбыз Динар Сәлахов куйды.